أحمد فؤاد نجم
بيان هام
بيان هام
هنا شقلبان
محطة إذاعة حلاوة زمان
من القاهرة
ومن كردفان
وسائر بلاد العرب
واليابان
ومن فنزويلا
وأيضاً إيران
ومن أى دارأو بلد مستباحة
بفعل السياحه
مع الأمريكان
هنا شقلبان
محطة إذاعة حلاوة زمان
نقدم إليكم بكل اللغات
مراسح وسيما وجميع الفنون
صحافة ومنابر
وتلفزويونات
وخطبا ف جوامع
وجبنه وزيتون
ودايما نلعلع فى كل الحالات
ولا حد سامع
ولا يحزنون
وتسمع ما تسمع دا ما يهمناش
لأن احنا اصلا
بناكل بلاش
فخليك فى نفسك وما تخليناش
نسلط عليك
القلم واللسان
هنا شقلبان
محطة اذاعة حلاوة زمان
لأن المخبى ظهر واستبان
وكل المسائل بدت للعيان
وطلعت حكاوى
ونزلت كمان
عن التهريبيه وعن كيت وكان
وعن محسوبيه وعن أُلعوبان
ظهر فى المدينه
كأنه الطوفان
وغرق مراكب وسوح غيطان
وبعض المراكب هتغرق كمان
وأزمة مساكن
وأزمة أمان
وعالم بياكل فى عالم جعان
وريحة مؤامره فى جو المكان
مخطط خيانة
مع الأمريكان
لدبح العشيره وحرق الجيران
وفيه ناس بترغى
ولازم بيان
لهذا وذاكا وتلكم كمان
نقدم اليكم عروسه وحصان
شحاته المعسل
وهذا البيان
------------------------------------------------
بسم الله
سلامٌ عليكم
وسلمون وموز
وأما المسائل فهنجف ولوز
فيا اخوتى ويا أخوات
اليكم بيانى
كما هو آت
جميع المسائل
تمام التمام
وكل الكلام دا
مجرد كلام
فصبرا جميلا ولا تقلقوش
وشغل الضغاين
أنا ما أقبلوش
ما فيش أى حاجه
على الطلاق والعتاق بالتلاته
ما فيه اى حاجه
وقدر كمان ان فيه أى حاجه
ما فيش أى حاجه
ما لوش أى لازمه الكلام
وعيب ان عيل يسوق السماجه
ويعمل لى باللو
ويعمل ديباجه
أنا بطبعى ضد السماسره الكبار
بحكم المنافسه وحكم الجوار
لكن مش فى طبعى
انى أعمل فضيحه
لواحد زميلى
هبش كام صفيحه
لا ده من قيمنا
ولا من شيمنا
ولا ده جوانا
ولا ده كلامنا
ـــــــــــ
ما كل الزمايل بتهبش صفايح
وكل اللى جاى
ماشي زى اللى رايح
فيا ايها الشعب صهين تفلعص
مساء التنفس
مساء الروايح
أخويا الامير بزرميط الايرانى
بعت لى السنه دى
عزمنى ودعانى
أنا قبلت فوراً
ورحنا العزومه
وكانت وليمه ما تحصلش تانى
دا إيه المحمر
وإيه المكمر وإيه المشمر
وإيه الصوانى
وانا دماغى تعبت ولفت صراحه
من الفخفخه والهنا الاصفهانى
هناك يعنى مثلا اذا شربت طافيه
تمز بكوارع
وبسطرمه ضانى
ما شفتش هناك ناس بتحقد عليهم
ولا ناس بتشتم
فلان الفلانى
لأنه اشترى عزبتين من شطارته
وحكمة ادارته
وطلع مبانى
وبعد الوليمه استلمنا الهدايا
مفضض ومدهب
وقز وقيشانى
وطبعا أخويا الأمير قال لى حاجه
ح اقولهالكو طبعا
اذا الوقت ناسب
ح يطلع لى عيل بدون اى حاجه
ويعمل لى فلحس
ويقعد يحاسب
دا حقد اشتراكى أنا ما أقبلوش
ولو هو ابنى
أنا ما اعتقوش
كلام عن سماسره
وكلام عن دعاره
وحاجات مش صحيحه
وجمل مستعاره
وعايزين يخلوا البلد
اردغانه
وعايزنى اسيب البلد
من زمان
وأنا مش ح اسلم
واسيب الأمانه
ولا بالبوليس والنيابه كمان
فيا ايها الشعب
كمل جميلك
وصبراً والزم هتيجى المصارى
وتاكل وتشرب تبع ما يآتيلك
وتملا الحوارى فساقى وقصارى
تسبح بحمدك
وتشكر جميلك
وفضل الزباله وطفح المجارى
ختاما سلاماً وآخر كلاماً
ضروراً
يسود الهدوء والوئاماً
فماذا وإلا
هطربقها والله
واهرب فلوسى
واسافر قواماً
سلام عليكم
وسلمون وموز
بصفتى رئيسا
واباً وجوز